Дүүжин гүүр
2025-12-08 11:18:59
Дүүжин гүүр: (2008.07.31)
Дархан-Уул аймгийн Дархан суманд байрлах Дүүжин гүүр нь тус аймгийн хэмжээнд хийгдсэн томоохон бүтээн байгуулалтын нэг бөгөөд хотын өнгө төрх, соёлын орчин, хот төлөвлөлтийн орчин үеийн шийдлийг илэрхийлсэн чухал дэд бүтцийн байгууламж юм. Энэхүү гүүр нь Дархан хотын “хуучин” болон “шинэ” хэсгүүдийг хооронд нь холбохын зэрэгцээ хотын төвийн соёл, нийгмийн гол бүсүүд болох Бурхан багшийн сэрэг дүр, Морин хуур цогцолбор, Миний Монгол цэцэрлэгт хүрээлэн зэрэг олон нийтийн ач холбогдол бүхий газруудыг уялдуулан холбодог. Тус дүүжин гүүр нь Монгол Улсад баригдсан анхны дүүжин гүүрүүдийн нэг бөгөөд уг бүтээн байгуулалтын ажлыг 2008 оны 4 дүгээр сарын 10-нд эхлүүлж, мөн оны 7 дугаар сарын 31-нд ашиглалтад албан ёсоор хүлээлгэн өгсөн юм. Гүүрийн зураг төслийг уран барилгач Ч.Пүрэвдорж боловсруулж, барилгын угсралтын ажлыг Бүгд Найрамдах Хятад Ард Улсын “Лихуа зам гүүр байгууламж” компани гүйцэтгэсэн байна.
Техникийн үзүүлэлтийн хувьд уг гүүр нь:
Нийт урт: 110 метр
Өргөн: 4 метр
Өндөр: 16 метр Өндөрт байрлах ган хийц бүхий явган хүний зориулалтын шугаман гүүр юм.
Энэхүү бүтэц нь хотын төв дундуур дайрсан автозамын хөдөлгөөнийг хөндлөн огтлолцолгүйгээр даван гарах боломжийг бүрдүүлж, иргэдийн аюулгүй зорчих нөхцөлийг хангахад чиглэсэн шийдэл болсон. Дүүжин гүүр ашиглалтад орсноор хуучин болон шинэ Дархан хотын хоорондын явган хүний зорчих хөдөлгөөн мэдэгдэхүйц сайжирч, хотын урд болон хойд хэсэг, соёлын цогцолборууд, амралт чөлөөт цагийн бүсүүдийг холбосон нэгдмэл орон зай бүрэлдсэн. Үүний үр дүнд автозам хөндлөн гарах шаардлага буурч, хөдөлгөөний аюулгүй байдал, урсгалын зохицуулалт сайжирсан төдийгүй хотын орчны гоо зүй, үзэмж нэмэгдэж, иргэдийн амарч зугаалах, соёлын арга хэмжээнд оролцох таатай, аюулгүй орчин бий болсон гэж олон нийт үнэлдэг. Иймээс Дүүжин гүүр нь энгийн утсан, төмөр хийцтэй гүүр гэхээсээ илүү Дархан хотын орчин үеийн хот байгуулалтын шийдлийг илтгэх, хүн амын хөдөлгөөн, нийгэм, соёлын үйл ажиллагааг уялдуулан холбосон, хотын хөгжлийн бэлгэдэл болсон стратегийн ач холбогдол бүхий бүтээн байгуулалт хэмээн дүгнэж болно.
